Mae Student Space yn fyw! Beth yw hwn a beth sy’n dod nesaf?

Heddiw rydyn ni’n falch o lansio platfform Student Space, sydd wedi’i ddatblygu i gefnogi myfyrwyr i fyw eu bywydau yn y brifysgol yn ystod pandemig y coronafeirws.                

Gyda diwrnod canlyniadau Safon Uwch (dydd Iau 13 Awst) yn drobwynt heriol ar galendr academaidd myfyrwyr, bydd y rhaglen newydd yn darparu cefnogaeth amrywiol sydd wedi’i chynllunio’n benodol ar gyfer myfyrwyr, ym mhob cam o’u siwrnai addysg uwch. 

Cyhoeddodd y Gweinidog Prifysgolion ddiwedd mis Mehefin y byddai Student Minds yn goruchwylio’r rhaglen 6 mis, sy’n cael ei chyllido gan Office for Students (OfS) a Chyngor Cyllido Addysg Uwch Cymru (CCAUC). Mae’n deg dweud bod y saith wythnos ddiwethaf wedi hedfan heibio! Diolch i gydweithredu aruthrol, llawer iawn o waith caled, a digon o ddatrys problemau yn greadigol, rydyn ni’n hynod falch bod y platfform ar y we yn fyw nawr ac ar gael i bob un o’r 2.3 miliwn o fyfyrwyr sy’n astudio ar raglenni Addysg Uwch ledled Cymru a Lloegr.  

Beth sy’n rhan o Student Space ar hyn o bryd?
Nod Student Space yw gwneud bywyd yn haws i fyfyrwyr ddod o hyd i’r gefnogaeth y mae arnyn nhw ei hangen yn ystod pandemig y coronafeirws, gyda gwybodaeth ddibynadwy, adnoddau ar-lein ac adnoddau i gefnogi myfyrwyr ble bynnag maen nhw gyda’u llesiant a’u hastudiaethau. Edrychwch ar y safle am gyfarwyddyd ar ddysgu ar-lein, delio â phrofedigaeth a gwneud ffrindiau o bell – sydd ar gael yn y Gymraeg ac yn Saesneg. Gallwch ddefnyddio’r gwasanaethau rydyn ni wedi’u comisiynu ar gyfer myfyrwyr sy’n teimlo’n ofidus neu dan bwysau efallai, gan gynnwys llinell gymorth dros y ffôn a chefnogaeth drwy negeseuon testun, a hefyd mynegai sy’n cyfeirio myfyrwyr at wasanaethau yn eu man astudio. Bydd yr adnoddau hyn yn cynyddu ac yn cael eu gwella i ddiwallu anghenion myfyrwyr fel maen nhw’n datblygu yn ystod y misoedd sydd i ddod. 

Diolch i bawb sydd wedi cydweithio gyda ni
Mae Student Space yn ganlyniad llawer o waith caled a chydweithredu rhwng nifer o sefydliadau yn ystod yr wythnosau diwethaf. Hoffem fynegi ein diolch i’r cannoedd o bobl sydd wedi gweithio gyda ni eisoes ar y rhaglen yma a chwarae eu rhan yn y gwaith o’n helpu ni i gyflawni hyn. Er bod gormod o bobl i’w henwi’n unigol, hoffem ddiolch i’n partneriaid craidd, oherwydd hebddyn nhw ni fyddem wedi cyrraedd y garreg filltir bwysig yma. Diolch yn fawr i’r canlynol: 

• Pob myfyriwr sydd wedi cymryd rhan yn ein profion ar ddefnyddwyr neu ddatblygu cynnwys, a hefyd ein pwyllgor cynghori myfyrwyr am ein hannog ni i fod yn uchelgeisiol ar gyfer myfyrwyr. 
• Yr amrywiaeth o arbenigwyr o fyd Addysg Uwch, Iechyd, Ymchwil, a Digidol sydd wedi ymuno â’n Grŵp Cynghori ar y Rhaglen a’r Grŵp Llywodraethu Annibynnol.  
• Y rhwydwaith o glinigwyr a gweithwyr proffesiynol sy’n gweithio gyda ni i greu seico-addysg berthnasol a chynhwysol.             
• Cyllidwyr y rhaglen - OfS a CCAUC – am fuddsoddi yn iechyd meddwl y myfyrwyr. 
• Y partneriaid gwasanaethu cyntaf i gael eu comisiynu gan Student Space - Shout a The Mix – a rhwydwaith AMOSSHE am helpu i greu’r mynegai cyntaf o wasanaethau i fyfyrwyr prifysgol.    
• Ein partneriaid digidol talentog yn William Joseph a Baringa.
• Ac yn olaf, ond nid y lleiaf, rhowch eiliad i ni fod yn falch ac yn ddiolchgar i’r tîm yn Student Minds. 

Felly, beth sy’n dod nesaf?
Nawr rydyn ni’n symud i’r cam cyffrous nesaf ar gyfer Student Space. Yn ystod yr wythnosau nesaf, byddwn yn datblygu mwy o gynnwys ac yn comisiynu gwasanaethau ychwanegol yn seiliedig ar wrando ar fyfyrwyr a chymunedau addysg uwch. Hefyd byddwn yn lansio adran sicrwydd ansawdd ar y platfform, gan gasglu mwy fyth o opsiynau cefnogi i un lle.   

Os ydych chi mewn sefydliad sydd eisoes yn darparu gwasanaethau defnyddiol, diogel a pherthnasol i fyfyrwyr, neu os oes gennych chi ddiddordeb mewn cael eich comisiynu i gyflwyno cefnogaeth gynhwysol sy’n ymateb i anghenion a phrofiadau amrywiol y gymuned o fyfyrwyr, cofiwch gadw llygad am ein galwad comisiynu a sicrwydd ansawdd yn ystod yr wythnosau nesaf.            

Yn olaf, yn ogystal â gweithio’n galed ochr yn ochr â’n rhwydwaith cynyddol o bartneriaid i hybu Student Space, fe fyddwn ni’n rhannu mwy o ddata a gwybodaeth gyda’r sector ehangach a’r gymuned, er mwyn i ni allu dysgu gyda’n gilydd i gyd.

Beth allwch chi ei wneud i helpu? 
Byddem wir yn gwerthfawrogi eich help i ledaenu’r gair am Student Space yn ystod yr wythnosau a’r misoedd sydd i ddod. 

Gall un person wneud gwahaniaeth i fywyd myfyriwr. Os ydych chi’n fyfyriwr gyda ffrind sy’n cael amser caled, yn rhiant sy’n sylweddoli bod ei blentyn yn nerfus am fynd yn ôl ar y campws, neu’n academydd neu’n addysgwr sydd eisiau cefnogi eich grŵp blwyddyn, gobeithio y byddwch yn teimlo bod Student Space yn adnodd gwerthfawr.

Rydyn ni’n falch iawn o’r hyn rydyn ni wedi’i gyflawni gyda’n gilydd hyd yma, ond mae llawer mwy i ddod – felly cofiwch gofrestru ar gyfer y diweddariadau e-bost i rannu’r datblygiadau cyffrous gyda ni. 

I weld Student Space ewch i studentspace.org.uk
Mwy o wybodaeth yn y Cwestiynau Cyffredin yn Student Space.